以經係第一百個人問我呢個問題：去d咁既地方，仲要咁辛苦，有咩好玩？
香港人係一個好固步自封既群體，唔容易接受新事物。大城市，金融中心，幾十年黎既富裕令我地接受唔到生活簡樸。香港人既旅遊熱點，從來係東京，首爾，大城市。就算星馬太，中國大陸，只住大酒店，包車接送，皇帝享受，當地既風景，非當地既生活。呢種旅遊甚至有個專門名詞，叫做 '港式旅遊' 。可想而知本港文化何其蜚聲海外。中國大陸對佢地黎講，只係代表污糟，農村，窮，非購物天堂，生活質素低。
其實唔係佢地差，係我地太好，過份好。
香港既生活質素一向係國際上數一數二。生活雖好，但係香港人既唔開心程度亦都比無數地方高。唔開心既主要原因，係唔知足。
得一，自然想二。而家社會，一出世屋企以經兩房一廳，有冷氣有雪櫃。著Nike波鞋番學。十歲聽住 MP3 去街。日日食快餐店，慣左有人服侍。唔開心因為唔夠錢買新相機，今年無得去旅行，男/女朋友無陪食飯睇戲，人工加得少,，樓價太貴。所有負面情緒都係發自… 想要更多。從一開始標準就比正常高，要求亦都直總向上。去到其他地方，總覺得事事唔對頭。餐廳有蚊，車坐得唔舒服，地方污糟，服務態度唔欣勤，個個做野慢手慢腳。一切都同香港相差咁多。
如果咩都一樣既話，咁仲有咩原因要黎？
身在外地，眼光盡量放開d。接受下其他地方既風土民情。多d了解香港以外既生活，食當地人食既野，住當地人住既地方，坐當地人坐既車。當見到佢地既生活都幾開心既時候，你會覺得自己耿耿於懷既事其實好鬼無聊。
P.S. 打緊字既時候，外面正遇到一個星期以黎首次見到既香港人，一對夫婦。女既正向男方投訴周圍既
野都唔岩食，地方又 'up dup' 。零願番酒店食杯面云云… 真可怕。
0 留言:
發佈留言