由於西藏暫時未通行,所以先出發去成都。
由麗江去成都既路線,好惡劣。計劃係由麗江先坐汽車去四川既攀枝花市,然後即日坐係攀枝花去成都既火車出發。麗江買好車票之後,第二朝八點鐘。坐上大巴先進入四川既攀枝花市。車程九個小時。
路況麻?極多彎,比以往既都多。開車四個鐘,以經開始有人係車上面嘔吐。同行朋友亦都半條人命咁既款。連我永不暈車既體格都唔多舒服。大家心知,仲有成大半車程,有排捱。終於司機因為忍受唔住惡臭,停低車比大半車人出路邊嘔。加上羅水洗車,大家亦可以趁呢個機會休息下。
下午四點半,終於到攀枝花,一心以為苦痛將會完結既時候,更恐佈既車再出現。由攀枝花去成都既火車,無臥鋪,只有硬座。車程十三小時。
無辦法,人都到左。無得咁多投訴。六點半鐘準時上車。點知仲有更恐佈既事…
每一個火車卡,122個座位。最後最少迫左二百個人開車,三個人既位坐五個人,行人道,廁所,卡與卡中間既位置,全部都企/訓滿人。洗手盤訓滿bb仔,甚至有人將bb仔放上行李架。
沿途既十三小時,過既係難民營既生活。踏入深夜,乘客因為眼訓,好多身邊既野都唔會理"包括我"。有人因為怕去廁所離開座位番黎會無位坐,寧願係自己個位既地板上面解決。另一邊,有人匿係座位底下訓覺,每人經過都要係佢身上面跨過,隨位地板周圍流既尿,啤酒,啖等等都流到佢身上… 打開廁所門,裡面有三個人埃住牆訓覺。有人企左十個鐘頭無訓,因為太累,會控制唔到自己咁坐係附近有位坐既人身上…
上午九點鐘,火車到達成都。由麗江到成都,全程坐左二十四個小時。落車既時候同個乞兒無分別。到步後再說。
[旅遊系列]成都 --- 惡夢車程
[旅遊系列]香格里拉
經滇藏線入藏原來唔係咁容易,加上近期暴動。惟有將入藏之行押後。
入唔到西藏,都先去香格里拉,睇下稱為小布達拉宮既松贊寧寺。
由麗江買去中甸(香格里拉)既車票,都幾貴。七十五蚊。坐六個鐘頭就到。沿途仲經過虎跳峽,景色怡人。進入香格里拉後,大片景色都係雪山,唔怪得人話去到香格里拉就覺得玉龍雪山無咩睇頭。
香格里拉溫差比盧沽湖更大。日頭到步的時候大慨係廿多度,住一晚,朝早起身門,門前結左一層好厚既冰,一直到下午都唔會溶。
幾有特色既旅館,仲有高原籃球場
第二朝一早起身,打算先到松贊寧寺門口睇睇售票狀況,再安排逃票計劃。見到旅館門口有架3路公交車到松贊寧寺,就諗住上左車再算啦。點知行到半路,寺都未見到,半途己經有個收費站!收松贊寧寺門票30蚊!一時殺個措手不及,只有乖乖比錢。下次真係要問清楚再去。
遠睇真係好似布達拉宮
仲有幾好彩地,比我見到刺麻既"辯經"活動。佢地會係特定既時間,圍埋一齊,選擇一d經文"激烈"咁辯論,包括用拍手呀,跳起呀,扔野呀等等去反駁對方及加強語氣。佢地認為咁可以增加知識喎。
朋友同藏族妹妹影既相
寺內既巨型觀音
p.s. 同場加映
象山公園,巨形轉經輪
[旅遊系列]長江第一灣
徒步虎跳峽返黎之後,由於重傷加重感冒,足足休息左四五日。
下一步,石鼓鎮睇萬里長江第一灣!
之所以叫長江第一灣,因為係金沙江既石鼓鎮呢段有一個360度既大彎角。個彎大到圍成左一個圈,相機都映唔晒,所以要睇一睇。
由麗江坐車去石鼓鎮,平常要兩個鐘頭。去既時候因為整路,所以要三個鐘頭。方法係係麗江先坐公交車去長水路,然後搵去石鼓鎮既面包車,每位三十蚊。坐滿人就出發。
麗江周邊既公路都唔太好,去虎跳峽如是、中甸如是、盧沽湖如是、石鼓鎮亦如是。震到七彩。
去到石鼓鎮,行到江邊。感覺係——咩都睇唔到… 條金沙江太大啦,企咁近跟本咩都睇唔到。向後睇睇,發現背後有個山。怕且都係又要爬上山先睇到啦!
岩岩行完虎跳峽,恐懼感仍在。為左行少d路,周圍向d村民打邊上山路線。點知每人都異口同聲話要收十蚊人仔帶路上山。真商業!於是惟有唔靠人自己爬。
努力一小時,腳痛又復發之後,終於見到長江第一灣!
相機其實都係影唔晒,以上只係用兩三張相駁埋做出黎既。
鎮入面仲有一個石鼓,傳聞鼓紋完好則風調雨順,有裂痕則有戰禍。姑且比五蚊門票入去影番張相。
[旅遊系列]徒步虎跳峽
徒步虎跳峽,每一個去完番黎既人、都只有一個字:累!
睇睇個地圖,全程一天半。二十多公里,唔算大痛苦者。
呢個係去之前既感想,呢一刻。我以經完成左番黎,左腳全隻腳無左知覺,右腳關節勞損,全身都痛,訓係床郁唔到。訓左兩日。
大痛苦啦!
事實上,對於我地城市人黎講,呢個行程唔係體力既考驗,係意志力既考驗。因為一定支持唔到。
由麗江出發,事前招攬左三個英國朋友同行,兩男一女。加上係麗江識既兩母女,一行七人包車向橋頭鎮出發。
徒步虎跳峽,就係穿越上中下虎跳三段。由橋頭鎮起步,中途經過哈巴雪山同玉龍雪山,徒步整個峽谷,於大具鎮完成。呢條路亦係古時茶馬古道,馬幫運送茶葉到西藏既必經之路。路段最高海拔二千六百米,最低只有千八。進入橋頭鎮的路況甚差,而且在修路。車程三個小時。由於出發太遲,到達橋頭以經係下午兩點幾。
一起程以經睇住玉龍雪山
有出發到第一晚既住宿,全條路都係懸崖
可能由於淡季既關係,或者係呢條路本身就唔多人行。所以沿途"全程"都無見到個人。
只係係第一個小賣部遇見兩個廣東人,後來佢地亦都同我地一齊行,於是。一行七人變成一行九人。
沿途見羊多過見人。
第一日,係途中既旅館休息左一晚。由於昨日行程延誤,所以今日一早就出發。
路亦愈行愈危險。
沿途要經過瀑布
水濕路滑,一路上沙泥又好鬆散,好危險。
下午四點鐘,到達中虎跳,行左大約七成既路程。九個人裡面有七個打算中途退出,於是佢地託當地旅店搵左架車提早結束旅程。我係呢個時候左腳關節亦都嚴重痛楚,開始有跛跛下既情形出現。但係既然完成左大部份,無理由唔行埋落去,所以剩番既兩個人繼續。
由中虎跳經"天梯"直爬落二百米以下既峽谷底,我終於發現原來呢兩日行既簡直係"安全通道"!
所謂既"天梯"就係跟本無路行!斜坡斜都無人有!全程之字形係兩三米之間盤旋而下,有d地方亦都真係要爬梯,有關地方只係係各彎位釘上綱索,好讓攀上攀落有地方借力。至於斜坡塌方,落石手濕腳滑跌落萬丈懸崖等等當然係各下自理。唔怪得旅遊書話行呢條路死左唔少人。
走到峽谷底,仲有一條路叫"一線天",係沿住峽谷底開出黎既一條山路。沿呢條路再行番上山,真係羅命,呢個時候,我左腳己經完全彎唔到,只係係山邊執左竹枝做拐扙。
同樣,右邊係懸崖,高原反應,頭暈暈。同伴見太高睇落下面,又覺腳軟軟。仲之大家都覺得好驚,真係驚行左十個鐘,呆呆地,一腳差錯,就咁玩完。
再加上木樓梯,梯下面又係懸崖。向下睇腳又軟,又係個句,好危險。
行完一線天,終於見到虎跳峽全景。
痛苦既留影 "己經無能力跳躍"
再痛苦地經過一大片梯田,雙腳以經無知覺,面容歪曲,行左去邊亦都無咩意識。
行到傻傻地既同伴
終於去到落腳既旅館,成晚都仲有不停爬山既幻覺,好可怕。
[旅遊系列]盧沽湖 --- 四川草海
[旅遊系列]盧沽湖 --- 摩梭人
[旅遊系列]盧沽湖
[旅遊系列]盧沽湖 --- 大逃票
係麗江先出發去盧沽湖,住兩三日再番黎。由麗江去盧沽湖有直接既中巴到達,車票七十蚊。但係係到達盧沽湖之前二十公里就以經會先遇上售票處,收取八十蚊既門票。為左逃票無所不用其極既我事前己經搜集過資料,決定唔坐游客專車,用偷渡入境既方法逃票!
由束河古鎮時既原班人馬四人,買左由麗江到寧蒗既汽車票上車。寧蒗係係麗江同盧沽湖中間既市鎮,普米族既居住地。亦係物資運送到盧沽湖、永寧等地既中途站。車程三個半小時,連接既"麗寧公路"其實都係一個景點黎,有名"麗寧十八灣"。其出名既地方在於危險。路窄山高加上無數個一百八十度彎,悄有意外就係全車跌落山崖,或者係山坡滾動二百米。其本上都好難生還。
到左寧蒗,先坐低食飯。再開始逃票大作戰。
食緊飯既途中我地以經物式緊可以供我地"偷渡"用既貨車,計劃就係混係貨車入面偷渡入境。前人話呢招萬試萬靈。最終同三四個司機討價還價知後,我地終於同其中一位達成協議。用每人五十蚊既價錢協助我地"入境"。車程三小時
於是,場面變成咁…
狀況極搞野,完全同笑片一樣。貨車係山路上面轉黎轉去既同時,我地亦係車裡面 fing 下 fing 下。
到達盧沽湖。正當大家認為,人蛇狀態可以完結既時候。第二件事又黎啦,原來貨車到既盧沽湖只係到達外圍既落水村,離我地要去既里格村仲有十多公里!而該地交通資源又極貧缺,包車入村要收五十大元!於是,係一日之內、我地又爬上左第二架貨車既車斗上面…
咁痛苦,目的只係慳番每人七十蚊"入場費"。同埋到步後大家相擁而泣高呼"We made it!"既快感。所謂,做人就係為左個份堅持…
(盧沽湖待續)