睇黎以經好似 John Nash 咁, 習慣左同耳邊既 Kero~ Kero~ Kero 一同生活, 久唔久仲識 Tama~ Tama~ Tama~ 咁共嗚下tim! 好順利咁又睇左八集, 仲有20集.
责任感爆棚的完美主义者的活法
10 年前
再續!!! Keroro !!!
放假睇好戲之 --- The Black Dahlia (艷屍案中案)
為咩睇? 咪又係Scarlett Johansson~~~ 對呢套野既意見係... 又長又閹悶. 真係悶得好嚇人, 
睇黎係導演唔岩我心水, 佢之前個套 "絕色偷天" 我以經唔知佢講咩. 點知今次仲嚴重! 我無睇過原著小說, 但係感覺得出如果睇原著慢慢讀應該幾好睇. 但係睇黎導演真係照住本小說一版一版咁跟住拍.... 短短兩個鐘頭我真係消化唔到個故仔, 完全睇唔明...
男主角有褔, 搞完呢個去搞第個番轉頭再搞番呢個, 床戲多到暈. 如果有更好既配樂可能會無咁悶.仲有好多煞有介事既鏡頭運用, 一時 fing fing 下呀, 一時轉轉下呀, 一時pan in 一時pan out. 仲有好多第一身鏡頭, 對焦時遠時近. fing 到頭都暈埋...... 真係唔識欣賞...
p.s. 最失望係今次 Scarlett Johansson 唔靚女. 仲有暗瘡.. >.<
搵食行遠D之 --- 花卉食坊 BBQ 場
尋日睇完一日既 Keroro, 今朝起身頭暈暈. 突然電話響先醒起今日約齊晒人燒野食. 即刻上網睇下個地址係邊, 開車赴約.
首先要講講, 今次係超級大投訴. 從來無試過去一個地方食野係有咁強烈比人昆水既感覺既! 一行十幾人到達"花卉食坊"既門口. 有人事前話曾上網睇過此地方網頁, 有話環境幾好云云. 但係未入去, 已經比個價錢牌嚇親 --- $98 位包一支水, 限時四小時, 坐多陣都得掛?. "都幾貴wo" 再睇睇d野飲 --- $10 支飲品, $6 細蒸溜水, $20 支細青島啤. "睇黎搶錢係d野飲wo..." 朋友話. 錢, 都算啦, 一大班人無謂扭扭檸檸. 點知一入都去~~ 嘩! 花卉食坊??! 有花咩?? 現場環境好似空置左幾年咁... 應該有花既地方全部都變晒一條條, 曬黃晒既權木. 無人淋水, 全部植物既狀態都好惡劣... 同之前想象既花開處處, 欣欣向榮既感覺完全唔同. 環境唔好. 服務態度亦係難以想象般差, 特別係唔知老闆定經理個位. 我覺得我好似欠佢好多錢咁, 十問九唔應. 問幾錢? "你睇唔到咩?", 汽水唔凍wo.. "係咁架啦". 好似好想我快d走咁. 埋位坐低, 有職員黎開爐, 見佢堆足一大車炭黎, 倒也唔慳野, 但係問題黎啦 --- 十分鐘之後個爐火旺到好似火焰山咁... 無人行到埋去. 全部人愈坐愈後... 後來跟本無人燒, 呢一餐食得真係好辛苦... 全部人貼錢買難受既感覺好強烈~~~
至於食物質素, 本來BBQ 食物都唔多要求架啦, 但係呢間野實在慳皮得好緊要, 據介紹, 有二十多樣BBQ 食品和熟食任羅仲有自助沙律等等等等. 現場呢~ 生既有十數樣全部都係最最普通個d 腸, 丸, 雞翼, 牛扒等. 全部醃左等於無醃. 熟食搵極搵唔到, 原來最則邊有盤清炒椰菜花同茄汁意粉... 無錯, 連肉醬都慳番... 沙律吧就係一堆生菜, 粟米粒,番茄同幾支沙律醬放係雪櫃. 個雪櫃係壞既. 裡面既野都係暖暖咁... 無人敢食. 調味料呢, 支美極鮮醬油裡面係唔知咩鼓油黎, 棘椒仔溝左好多水, 蜜糖係沖黎飲個d百花蜜溝水.... 每一個部份都好得人驚... 入場時每檯 (約十人)獲派一個鐵盤, 規柜係只可以用個個鐵盤出去羅野食, 食完先可以再羅... 感覺完全同去乞無分別. 加炭啦wo~ 諗住比成$98, 成檯加埋成兩千蚊啦wo, 唔係要我自已搞掛??? 結果朋友出去只係乞到一對膠手套番黎... 個爐燒到紅晒成班男人又用叉又用腳身水身汗... 擔泥都無咁辛苦... 此情此景... 眼裡面真係有兩行熱淚流緊落黎~~ 真係此刻無價!!! 比人搵苯實到咁既地步~~ 呢一世都會記住!!!!
點雪茄 --- 尼加拉瓜雪茄
一向, 雪茄都係古巴先正宗! 正如今日亦有好多人覺得葡萄酒法國先係野一樣. 自己覺得多明尼加雪茄一樣有可取之處. 亦正如古巴好比old world 酒, 多明尼加好比 澳洲,智利等new world 酒一樣.
今次大膽D, 似下尼加拉瓜既. 冷門歸冷門, 事實上, 尼加拉瓜, 宏都拉斯等都係幾個雪茄主要生產國之一.
拎上手第一個感覺係 --- 粗!. 的而且確, 茄衣既手工係無靚既多明尼加煙咁仔細, 但係亦好証明佢強調既100%手捲. 當然價位唔同亦係一個主要原因, 貴d既相信同樣手工都會好d. 剪口後, 個cap 碎左一截, 又係唔靚既証明啦! 點知點火後... '又唔係咁差wo..." 朋友話. 口感淡而順滑, 好有多明尼架既風格. 甜味突出. 好重咖啡同Coco 既香味. 煙少, 燒得好慢. 但係又有適中既 finishing. 較唔好既係, 燒得唔係好靚仔. 相信第日可以再搜購一d 好既再研究研究~~ 哈!
搵食行遠D之 --- 富田和食亭
好
食! 日本野一向講究 presantation, 不過好似和民咁既居酒屋形式日本菜以價格相宜做主打. 外觀自然不能大多要求. 不過呢間新野價錢故之然唔係貴, 野上到檯亦能見得大場面! 如此係到食左一餐, 淨係盛載器具見佢地羅出羅入都有三四個系列, 檯檯都有唔同樣. 菜式擺碟都可算係有花唔少工夫! 加上各壽司一般只係十數元. 三文魚壽司一客只係 $9!!! 有咁既樣, 真係難能可貴. 難怪新開無耐以經咁旺場! 希望佢地唔好好似一般食店咁, 可以繼續惟持住品質啦.
惟一不足既係地方太窄啦, 行出行入都要借歪借歪. 不過世事邊有完美呢~~~
訂閱：
文章 (Atom)