我與抗震救災T-Shirt與大雁塔
旅館貓貓，名字叫火鍋，比一般家貓大隻好多，但係又無英短既圓圓肥肥。但係又手粗腳粗喎，品種不詳。
左起：馬隔子汶，羌族人。Jan-Henlrik，德國人。Stephanie，德國人。劉昭君，滿族。寶玲，新加玻人。
加拿大三小花，二十歲，青春無敵。大學一年班。名字全都忘記了。
Huge Dixon，英國人。肥腸泡膜，西安小吃。
左起：劉昭君。我。孫健，上海人。Apple，重慶人。Huge Dixon。檯面，黃肉西瓜四個。
##CONTINUE##
法門高中全體學生加 Huge Dixon加法門寺二十四院加寶塔一座。
娜威朋友，二十三歲。名字大長記唔到。正在扮兵馬俑。
Katy，美國西岸，二十二歲。又扮兵馬俑。
由於仍然未離開西安
所以陸續再更新。
西安，據資料。中國先後有十三個皇朝在此建都。係文化遺產既集中地。黎到第一件事，就係去睇我最鐘意既博物館。
西安歷史博物館係中國其中一個有名既博物館，設施完備。平時去香港博物館，館內主要展品可能不過千餘件，加埋大量複製品七拼八揍先可以做成幾個見得人既展廳。今日睇門口介紹，西安歷史博物館，館藏文物三十七萬件！由遠古石器，商周朝青銅器，秦代陶甬，漢唐金器，銀器到三彩釉。要咩有咩。實地參觀先有意思，少少相即管比大家睇睇。
二十個鐘火車，一朝早到達西安火車站。選擇住邊間旅舍成為一個難題。因為西安城既青年旅舍有四五間，之前有人提及七賢奘比較好，而且呢間比較近火車站。於是成為第一選擇。
到達門口。出乎意料之外，旅館位置並唔好。附近咩都無。行入門口，可能我太早到。前台無人，企係門口無無謂謂等左五分鐘。左望右望之下，突然發現呢度床位要六十蚊日！差D就住左豪華旅店！無需考慮，即時退出。坐出租車去書院青年旅舍。
又幾唔錯喎，前台有空調，三個院子。樓下有酒吧有餐廳，有波台有兵兵球。位置又近市中心。最重要既係，廿蚊日。住客仲有 happy hour 免費啤酒！ Oh Yeah~~ 太好了。
終於有機會試一下西藏既飲食文化。
遊牧民族，食既當然係肉。除左大片肉之外，仲有青棵。遊覽藏區既時候成日會食到青棵餅飲到青棵酒。原來最主要既，仲有樣叫瞥粑既物體。
就係咁樣，製造既原料都係青棵，原本係粉狀物。食之前要放係手上面搓揉，搓成一團。與酸奶同食。相信呢種做法係為左方便攜帶，同游牧生活有關。
然後就係奶茶。
藏式飲料，主要就係酥油茶同奶茶。呢種奶茶，跟本就係奶。但係係濃濃既奶香入面，又確有少少茶香，非常好飲。滿滿的一大壼，可以飲成晚。
主菜，秏牛肉。
完全無加工，原始牧民食法。用手羅住用刀切，放入口。無味精，無鬆肉粉，原原本本既肉香。
太贊了!!!
竟然唔記得出樂山大佛！！
成都時既景點而家補貼—
十分之大既大佛，名不虛傳。睇介紹呢起呢個大佛用左一百年，轉左三代人。高七十五米。的確比之前去過既南海觀音什麼的都要誇張。
加一段短片可能會傳神d
本來原定計劃係由成都坐鐵路直到拉薩既。但係至從518大地震之後，所有向北面既鐵路停駛。包括我朝思暮想既 T22 線川藏鐵路。而且復班時閒遙遙無期，同時，所有其他班次只售賣當日車票。意思即係爭崩頭。基於期望情況會有發展，我以經係成都等左四日。逼於無奈下，惟有改變線路，先去剛剛係呢兩日復班既西安 (但係都要繞道，行車時間由本來既二十小時增加到差唔多三十小時)。然後來日再經青海西寧，青藏線入藏。繞左一大個圈，而且咁行之後。如果唔想依原路回程的話，恐怕要經新疆、甘肅敦煌、蒙古等地回歸中原。結果愈行愈遠，真正環遊中國。
己買了5月24號成都到西安火車票，西安見!
兩千年前既水利工程，係出文既時候。個度以經變成左廢墟。可以趁呢個機會懷愐一下。
係唔係好遠既七十年前，呢條水壩都仲係用豬籠，石頭堆出黎既。年年花費大量人力物力堆水壩。後黎己經改用電動水閘。
古人以原本一條既江水側邊，再挖出下面既一條內江，用黎做成都市既飲用水同灌溉。呢個設計到而家仍然係呢個樣。
古時水壩既原型，叫"馬槎"。用竹同石頭搭成。
每年清明，都江堰放水，就係用繩將馬槎拉斷，比水沖走。等水係唔同季節既流量平衡。
更可怕既係，內江既設計上水量仲可以調節，仲有隔沙既作用。真厲害。
呢個隔沙用既飛沙堰同寶瓶口，以前都係一座山。古時人工將山體挖開，挖出黎既山石就用黎做在兩條江中間既提壩。兩千年前以經可以做到移山填海。真係一個壯舉。
可惜，而家全部都無辦法保留，比地震破壞了。
落到山後，終於睇到個情況—落山既路幾乎全部塌晒，全部人都係外面地上搭晒帳蓬。有d人訓係車入面，我地四人由於太遲到達，己經分唔到帳蓬。管理處既人安排左我地坐係售票處既單層平房入面，先坐到天光，再作打算。無辦法，惟有日頭先算。
凌晨五點半，仲落緊雨。一起身就立即去搵帳蓬，為自己今後幾日既容身之所諗辦法。我估計，能夠係呢個環境搵到帳蓬既機會唔係好大。去左附近幾個店後，幸運地比我地搵到一個舊式既軍用帳蓬。因為呢種帳蓬架設難，本地人唔識用，所以成功比我地租到。但係呢種帳蓬有個好大既問題，就係唔防水！
日出後，終於見到現場情況—
無水，無電，全部人住晒出黎。周圍都係塌方，落石，塌牆之後既場面。
眾人議論紛紛，有旅客想即刻離開，有人應為太危險。我搵搵其他人收集一下資料，發現三個香港人唔知去左邊，搵極搵唔到。另外，通向外面既夾金山同巴郎山都係海拔極高既危險山路，呢個時候行呢d路等於送死。手機無訊號無辦法知道外面點，路通唔通都唔知道。跟本無辦法肯定條路無塌方。惟一可行既辦法就係去小金，繞路回成都。路也相對比較安全。
但有係小金黎既司機話條路己經塌左，去唔到。以且小金之後既路，完全無辦法知道。見一步行一步，太危險了。現時情況就係，無路可行。惟有先係帳蓬待個一兩日。
等二日夜晚，落大雨，唔防水既帳蓬終於頂唔住。全濕。怕且唔走都唔得了。
朝早起身，打聽一下路線。聽聞凌晨時電話訊號曾經出現過。有人問到小金既路己經通番，康定與丹巴等地既交通無受影響。咁只要搵到車去小金，又搵到車由小金去丹巴，就可以從丹巴番去了。即時搵人問清楚！
係兩個外國人口中問到，佢地曾經搵過管理處同公安幫手，有關人等話由於通訊困難，一時搵唔到車，搵到之後會安排佢地離開日隆去小金，於是佢地就番黎等。成村都係人，太唔夠積極掛？幾時等到你？於是搵齊同伴分頭行事，執好晒d野後去管理處等到有車為止。
進行途中，三個香港人忽然出現！於是順便帶埋佢去搵車。走唔走到各安天命。
一個鐘頭之後，管理處安排到一架旅遊團既觀光車載埋我地出去。三個香港人都趕得切上車。
到達小金之後，問題先開始。小金搵唔搵到車去丹巴實在係斷鬼估，而且據報全部油站停油。能唔能夠搵到有油既車真係唔敢肯定。另外，陸續到達小金既人將會越黎越多。到時人多車少，一定無機會。走唔走到就睇呢一個鐘可以做咩啦。
就係大家與其他車既人係度行黎行去搵車時。我地竟然係旅遊交通服務部到打聽到由小金去丹巴既路早前塌左方，所以全部車集合晒係一個九唔搭八既小金氣象局停車場入面等開車！咁既地方！鬼有人搵到咩？即刻拉齊人馬衝過去！
去到真係有幾架車係到 stand by 緊，盡快係未有人搵到黎之前搞店架車有咁快走咁快。腦裡面浮現緊 Amazing Race 既情節。最後，我地 team 人決定先開出架車，去到塌方既路段，等路一通就立即通過。雖然危險，但係有效。
車開得極快，因為司機都好驚。去到塌方地段，睇住堆土車清埋現場，司機一路望住山坡上面，驚有石頭跌落黎。
清好路後，司機亡命飛車逃離災區。15號 下午四點鐘，終於到達丹巴，基本上丹巴己經唔係災區了,，有水有電有通訊，交通正常。仲可以睇電視了解下周圍點情況呢。搵個賓館住一晚，買定第日既車票丹巴去成都就可以番去。 兩晚無訓，四日無沖涼洗面，衫褲全黑。床都好耐無見過了。訓死左一晚後。16號下午番到成都。
逃亡成功！
五月十一號從成都坐車到達日隆鎮。車程七個小時。同行既仲有係武漢黎學生既小佩跟小月，同埋北京黎既KK。日隆鎮係都江堰既西邊一百多公里汶川既南邊，係四姑娘山既山腳，亦係爬四姑娘山既必經落腳點。車程中需要翻越海拔4500米既巴郎山。呢個己經係對爬山者既第一個考驗。同車既仲遇到三個香港人。
車到達最高點既時候，同行兩女一男相繼出現頭痛，氣喘等高原反應。我因為之前係係雲南等高原地帶玩左成個月，所以無咩特別反應。但係後面既三個香港男生症狀極嚴重，表情痛苦，後來從佢地口中得之，佢地係前一晚先飛機到成都，第朝一早就直接坐車黎挑戰。好明顯挑戰係失敗既。
係最痛苦既時候，車上有一位係日隆鎮經營旅館既女人向我地搭訕。一眾人無多諗就決定入住呢位女士既山之旅客棧。
日隆鎮
四姑娘山共四個山峰，分別為大、二、三、四姑娘。大姑娘山海拔5200米，最低最易爬，逐部到四姑娘山6500米。至今能登頂的不足二十人。四個山一級一級的，好似專為爬山者而設咁。計劃原本係打算登大峰，作為登山既入門測驗。但係眼見同伙的高原反應如此劇烈，睇黎要登山應該係無可能了。所以計劃改為大峰二峰中間既海子溝穿越露營，兩天一夜。三個香港人一心黎征服山峰，打算明天先休息一天，嘗試克服高原反應，再作決定。
明天早上先出發，安排好露營用品，搵好響導後，先至三四點。所以大伙連三個香港人決定先包車黎個夾金山（隔離既山）半日團，仲可以睇睇四姑娘山全景。
五點多上到夾金山，超嚴寒。拍幾張照片就頂唔順，上番車落山。
p.s.呢條線亦係後來通去汶川災區最先打通既西線既其中一段。
落番山腰，先去探訪一下牧家樂。牧定樂其實同農家樂差唔多，不過佢係唔係耕田係牧牛既。帶同行既朋友試下藏家既耗牛奶，青棵餅，酥油茶。三個香港人完全提唔起勁，高原反應太厲害了，令人懷疑佢地能唔能夠爬山。
好可愛既bb
沿途的風景
車停係一個位，可以遠觀四姑娘山，一二三四，由低到高，惟獨最高既四峰比雲蓋住，唔係好清楚。
第二日早上，一行人出發進入海子溝。由入口到我地既露營地點大海子，距離大約十二三公里，海拔由3400到3800米。屬於無難度既類型，而且為照顧女孩子，特別再請左一隻騎馬，一隻馱馬。連野都唔洗羅，完全係舒服團。連埋係路上遇到同一個時間出發既其他馬隊，可以話係浩浩蕩蕩。
啞口上有一個大白塔，成為左一眾登山人士集合既標記
步行四個小時後，近距離見到大姑娘
就係呢個時候，我地遇到七點八級既大地震。我地有義氣既響導率先用最快既速度逃走！但係係山上面，都無咩地方好走。騎緊馬既小佩一落馬，馬就驚到跳起人立，然後唔知跑左去邊。
一時之間，大家已為係雪崩，但係好遺撼影唔到雪塌落黎。由於山上無咩建築物，睇唔到有咩傷亡，所以大家都唔係好驚，集合後再搵番個個逃亡左既響導出黎，就準備再出發。
地震後，整個山既路都係咁樣既裂痕。
再行八公里，計劃中既露營地點大海子出現。高山湖泊永遠有個特點，就係凍！超凍。
到達後，一直忙於整理帳蓬。但係山上住既山民，挖蟲草既村民，一律急急腳落山。唔敢再留係山上。往後既幾個鐘頭，一直有餘震出現。我地評估一下形勢，覺得可能係山上面仲安全過黃昏趕落山，於是又吃喝玩樂咁準備過夜。
惡夢黎啦！晚上八點多既時候山上管理處既人終於搵到我地，全山上既旅客都要即晚落山。九點鐘預測會有一次好勁既餘震咁話。兩個女仔不知所措，而且上山馬以經走左，其中一位妹妹高原反應比較嚴重，行步路都叫辛苦，基本上全程都係騎馬。而家叫佢行夜路番去可以話係無可能。但係情況無得揀，惟有快走。
晚上行山，女仔怕黑，咁岩唔係滿月兼成天烏雲。跟本係伸手不見五指，成隊人竟然得我一個有手電筒！此時此刻，跟本無得埋怨有人竟然可以去露營唔帶電筒… 於是，走走停停連哄帶騙，終於係晚上一點鐘落到接近山腳既地方。
日頭既白塔，己經變成咁樣。
可怕吧？落到山，總算避開一部份危險，但係之後個兩日仲係走難狀態。
下一篇再講。
