首先要介紹既係，係四川地震、一齊被困四姑娘山既Rita --- 十八歲武漢學生妹。愛好係食食食。
黎到武漢，呢個放暑假，無咩好做既人就可以同我一齊去玩。學生真係好，特別係讀書叻既學生。好似佢咁，保送升學，避免左令人聞風喪膽既高考。仲由十二月開始吃喝玩樂到九月先開學。仲要入讀名頭響噹噹既武漢大學！真係恨到恨唔黎。
黎到新地方第一件事，永遠都係小食街。
武漢有兩個有名既小食街，戶部巷同首義園。先去戶部巷睇睇先。
估唔到… 戶部巷好細！只係一條短短既巷仔。食既都唔係真係好多，都唔知點解咁有名。
細還細，試食活動仍然同人民革命一樣，係必需要進行的！
其中兩樣：
武漢人既傳統早餐---熱干面
早餐既原理係容易，熱干面就係將隔夜面條拖熱水，再撈上麻醬、蔥花、菜干等等。撈成一碗面。簡單方便，武漢人早上大多食佢。
另外，就係燒梅。
一睇外形就知…跟本係我地廣東人食既燒賣！至於係廣東傳去武漢定武漢傳入廣東就唔知啦。
不過，武漢既"燒梅"，用既餡料有d唔同。佢地鐘意用糯米，仲有胡椒。有少少辣既，好怪。
但係同行既 Rita 食得好鬼開心。
"我肚子又餓了…" 咬住舊燒梅既佢話。一個九十幾磅既女仔可以食咁多野，真係好似睇表演咁。
好！離開戶部巷。再進軍另一個小食場 --- 首義園。
好明顯，呢個地方既管理好得多。刷咭制，集中收費。地方都大好多，希望食品既質素都係同樣好啦。
其中兩樣：
糊面加油條。糊面即係一堆唔知用咩做既糊加一份面。由味道完全無辦法推斷佢既成份，不過幾好食。原本佢既造型唔係咁既。不過未黎得切映相，就比隔離個個為食到極點既朋友食在兩啖，搞成咁樣。
灌湯小籠包。唔係特別野，但係做得好唔錯！皮又薄，湯又多，又唔容易夾穿。味道一 d 都唔差得過上海南翔小籠包。仲有好多仲餡料選擇，最靚既蟹皇餡都係三十塊。好抵！
今日，都係唔洗再食飯啦…
0 留言:
發佈留言