本來原定計劃係由成都坐鐵路直到拉薩既。但係至從518大地震之後，所有向北面既鐵路停駛。包括我朝思暮想既 T22 線川藏鐵路。而且復班時閒遙遙無期，同時，所有其他班次只售賣當日車票。意思即係爭崩頭。基於期望情況會有發展，我以經係成都等左四日。逼於無奈下，惟有改變線路，先去剛剛係呢兩日復班既西安 (但係都要繞道，行車時間由本來既二十小時增加到差唔多三十小時)。然後來日再經青海西寧，青藏線入藏。繞左一大個圈，而且咁行之後。如果唔想依原路回程的話，恐怕要經新疆、甘肅敦煌、蒙古等地回歸中原。結果愈行愈遠，真正環遊中國。
己買了5月24號成都到西安火車票，西安見!
兩千年前既水利工程，係出文既時候。個度以經變成左廢墟。可以趁呢個機會懷愐一下。
係唔係好遠既七十年前，呢條水壩都仲係用豬籠，石頭堆出黎既。年年花費大量人力物力堆水壩。後黎己經改用電動水閘。
古人以原本一條既江水側邊，再挖出下面既一條內江，用黎做成都市既飲用水同灌溉。呢個設計到而家仍然係呢個樣。
古時水壩既原型，叫"馬槎"。用竹同石頭搭成。
每年清明，都江堰放水，就係用繩將馬槎拉斷，比水沖走。等水係唔同季節既流量平衡。
更可怕既係，內江既設計上水量仲可以調節，仲有隔沙既作用。真厲害。
呢個隔沙用既飛沙堰同寶瓶口，以前都係一座山。古時人工將山體挖開，挖出黎既山石就用黎做在兩條江中間既提壩。兩千年前以經可以做到移山填海。真係一個壯舉。
可惜，而家全部都無辦法保留，比地震破壞了。
落到山後，終於睇到個情況—落山既路幾乎全部塌晒，全部人都係外面地上搭晒帳蓬。有d人訓係車入面，我地四人由於太遲到達，己經分唔到帳蓬。管理處既人安排左我地坐係售票處既單層平房入面，先坐到天光，再作打算。無辦法，惟有日頭先算。
凌晨五點半，仲落緊雨。一起身就立即去搵帳蓬，為自己今後幾日既容身之所諗辦法。我估計，能夠係呢個環境搵到帳蓬既機會唔係好大。去左附近幾個店後，幸運地比我地搵到一個舊式既軍用帳蓬。因為呢種帳蓬架設難，本地人唔識用，所以成功比我地租到。但係呢種帳蓬有個好大既問題，就係唔防水！
日出後，終於見到現場情況—
無水，無電，全部人住晒出黎。周圍都係塌方，落石，塌牆之後既場面。
眾人議論紛紛，有旅客想即刻離開，有人應為太危險。我搵搵其他人收集一下資料，發現三個香港人唔知去左邊，搵極搵唔到。另外，通向外面既夾金山同巴郎山都係海拔極高既危險山路，呢個時候行呢d路等於送死。手機無訊號無辦法知道外面點，路通唔通都唔知道。跟本無辦法肯定條路無塌方。惟一可行既辦法就係去小金，繞路回成都。路也相對比較安全。
但有係小金黎既司機話條路己經塌左，去唔到。以且小金之後既路，完全無辦法知道。見一步行一步，太危險了。現時情況就係，無路可行。惟有先係帳蓬待個一兩日。
等二日夜晚，落大雨，唔防水既帳蓬終於頂唔住。全濕。怕且唔走都唔得了。
朝早起身，打聽一下路線。聽聞凌晨時電話訊號曾經出現過。有人問到小金既路己經通番，康定與丹巴等地既交通無受影響。咁只要搵到車去小金，又搵到車由小金去丹巴，就可以從丹巴番去了。即時搵人問清楚！
係兩個外國人口中問到，佢地曾經搵過管理處同公安幫手，有關人等話由於通訊困難，一時搵唔到車，搵到之後會安排佢地離開日隆去小金，於是佢地就番黎等。成村都係人，太唔夠積極掛？幾時等到你？於是搵齊同伴分頭行事，執好晒d野後去管理處等到有車為止。
進行途中，三個香港人忽然出現！於是順便帶埋佢去搵車。走唔走到各安天命。
一個鐘頭之後，管理處安排到一架旅遊團既觀光車載埋我地出去。三個香港人都趕得切上車。
到達小金之後，問題先開始。小金搵唔搵到車去丹巴實在係斷鬼估，而且據報全部油站停油。能唔能夠搵到有油既車真係唔敢肯定。另外，陸續到達小金既人將會越黎越多。到時人多車少，一定無機會。走唔走到就睇呢一個鐘可以做咩啦。
就係大家與其他車既人係度行黎行去搵車時。我地竟然係旅遊交通服務部到打聽到由小金去丹巴既路早前塌左方，所以全部車集合晒係一個九唔搭八既小金氣象局停車場入面等開車！咁既地方！鬼有人搵到咩？即刻拉齊人馬衝過去！
去到真係有幾架車係到 stand by 緊，盡快係未有人搵到黎之前搞店架車有咁快走咁快。腦裡面浮現緊 Amazing Race 既情節。最後，我地 team 人決定先開出架車，去到塌方既路段，等路一通就立即通過。雖然危險，但係有效。
車開得極快，因為司機都好驚。去到塌方地段，睇住堆土車清埋現場，司機一路望住山坡上面，驚有石頭跌落黎。
清好路後，司機亡命飛車逃離災區。15號 下午四點鐘，終於到達丹巴，基本上丹巴己經唔係災區了,，有水有電有通訊，交通正常。仲可以睇電視了解下周圍點情況呢。搵個賓館住一晚，買定第日既車票丹巴去成都就可以番去。 兩晚無訓，四日無沖涼洗面，衫褲全黑。床都好耐無見過了。訓死左一晚後。16號下午番到成都。
逃亡成功！
五月十一號從成都坐車到達日隆鎮。車程七個小時。同行既仲有係武漢黎學生既小佩跟小月，同埋北京黎既KK。日隆鎮係都江堰既西邊一百多公里汶川既南邊，係四姑娘山既山腳，亦係爬四姑娘山既必經落腳點。車程中需要翻越海拔4500米既巴郎山。呢個己經係對爬山者既第一個考驗。同車既仲遇到三個香港人。
車到達最高點既時候，同行兩女一男相繼出現頭痛，氣喘等高原反應。我因為之前係係雲南等高原地帶玩左成個月，所以無咩特別反應。但係後面既三個香港男生症狀極嚴重，表情痛苦，後來從佢地口中得之，佢地係前一晚先飛機到成都，第朝一早就直接坐車黎挑戰。好明顯挑戰係失敗既。
係最痛苦既時候，車上有一位係日隆鎮經營旅館既女人向我地搭訕。一眾人無多諗就決定入住呢位女士既山之旅客棧。
日隆鎮
四姑娘山共四個山峰，分別為大、二、三、四姑娘。大姑娘山海拔5200米，最低最易爬，逐部到四姑娘山6500米。至今能登頂的不足二十人。四個山一級一級的，好似專為爬山者而設咁。計劃原本係打算登大峰，作為登山既入門測驗。但係眼見同伙的高原反應如此劇烈，睇黎要登山應該係無可能了。所以計劃改為大峰二峰中間既海子溝穿越露營，兩天一夜。三個香港人一心黎征服山峰，打算明天先休息一天，嘗試克服高原反應，再作決定。
明天早上先出發，安排好露營用品，搵好響導後，先至三四點。所以大伙連三個香港人決定先包車黎個夾金山（隔離既山）半日團，仲可以睇睇四姑娘山全景。
五點多上到夾金山，超嚴寒。拍幾張照片就頂唔順，上番車落山。
p.s.呢條線亦係後來通去汶川災區最先打通既西線既其中一段。
落番山腰，先去探訪一下牧家樂。牧定樂其實同農家樂差唔多，不過佢係唔係耕田係牧牛既。帶同行既朋友試下藏家既耗牛奶，青棵餅，酥油茶。三個香港人完全提唔起勁，高原反應太厲害了，令人懷疑佢地能唔能夠爬山。
好可愛既bb
沿途的風景
車停係一個位，可以遠觀四姑娘山，一二三四，由低到高，惟獨最高既四峰比雲蓋住，唔係好清楚。
第二日早上，一行人出發進入海子溝。由入口到我地既露營地點大海子，距離大約十二三公里，海拔由3400到3800米。屬於無難度既類型，而且為照顧女孩子，特別再請左一隻騎馬，一隻馱馬。連野都唔洗羅，完全係舒服團。連埋係路上遇到同一個時間出發既其他馬隊，可以話係浩浩蕩蕩。
啞口上有一個大白塔，成為左一眾登山人士集合既標記
步行四個小時後，近距離見到大姑娘
就係呢個時候，我地遇到七點八級既大地震。我地有義氣既響導率先用最快既速度逃走！但係係山上面，都無咩地方好走。騎緊馬既小佩一落馬，馬就驚到跳起人立，然後唔知跑左去邊。
一時之間，大家已為係雪崩，但係好遺撼影唔到雪塌落黎。由於山上無咩建築物，睇唔到有咩傷亡，所以大家都唔係好驚，集合後再搵番個個逃亡左既響導出黎，就準備再出發。
地震後，整個山既路都係咁樣既裂痕。
再行八公里，計劃中既露營地點大海子出現。高山湖泊永遠有個特點，就係凍！超凍。
到達後，一直忙於整理帳蓬。但係山上住既山民，挖蟲草既村民，一律急急腳落山。唔敢再留係山上。往後既幾個鐘頭，一直有餘震出現。我地評估一下形勢，覺得可能係山上面仲安全過黃昏趕落山，於是又吃喝玩樂咁準備過夜。
惡夢黎啦！晚上八點多既時候山上管理處既人終於搵到我地，全山上既旅客都要即晚落山。九點鐘預測會有一次好勁既餘震咁話。兩個女仔不知所措，而且上山馬以經走左，其中一位妹妹高原反應比較嚴重，行步路都叫辛苦，基本上全程都係騎馬。而家叫佢行夜路番去可以話係無可能。但係情況無得揀，惟有快走。
晚上行山，女仔怕黑，咁岩唔係滿月兼成天烏雲。跟本係伸手不見五指，成隊人竟然得我一個有手電筒！此時此刻，跟本無得埋怨有人竟然可以去露營唔帶電筒… 於是，走走停停連哄帶騙，終於係晚上一點鐘落到接近山腳既地方。
日頭既白塔，己經變成咁樣。
可怕吧？落到山，總算避開一部份危險，但係之後個兩日仲係走難狀態。
下一篇再講。
終終第一次爬雪山！爬上山頂個隻！係個尖尖度睇落黎真係好勁！
西岭雪山海拔三千四百米，唔算好高。離成都只係三個小時既車程。初到成都時以經係四月，以經過左西岭雪山既積雪期，應該無雪睇。本來都有少少失望，點知到步後幾日，山上面忽然落左場大雪！大家即刻重燃希望，第二朝一早就去爬山。
山腳
吊橋，瀑布。以經見慣見熟。
由後山經山路爬上山頂，大約需要十個小時。山上沿途每二個小時既路程都會有接待站比人留宿，只要預計好時間，一般都唔需要訓山邊既。
第一日，係入黑之前以經爬上二千八百米既大山門接待站，高度開始接近雲層。由於路比雲蓋住，前面咩都睇唔到。
偶然有雲層會散開一兩分鐘，但係好快又會合番埋。大自然既奇妙！
到達接待站，環境只係預料中既差，都未去到惡劣既地步。
無自來水，無電，由於接待站係舊雲入面---正正係雲層中間，所以極之潮濕。周圍都發晒莓。蛇蟲都多。好彩仲有熱水，有飯食。以經好唔錯。
接待站既人話佢地每個月會落一次山，買齊需要既野，然後請馬夫馱上山。天黑訓覺天光起身，夠晒自然。
第日一早。爬高十百幾十米，終於比我見到呢幾個星期黎既目標---雲海！
高過舊雲既感覺真係好，兩日既辛苦無白費~
一行人瘋狂咁影完一輪後，開始再向上出發。
雲層以上，以經係遍地積雪，鐘意影相既朋友不停搶奪我部相機。
我都影左d
第二日下午，終於爬到上山頂。
非常痛苦，但係可以睇到咁樣既名山大川，亦都值得~~
四川，小吃無數。到處街頭都見到賣各種小食既檔口，難得肚腩仲有d配額。一於食均佢！
三大炮
其實就係雷沙湯圓咁上下既糯米。食就無咩好食，買既入主要係欣賞有如開壇作法咁誇張既製作過程。面團係師傅手上扔上扔落，最後扔落鼓皮面反彈又反彈，發出驚人聲響。所以叫三大炮。
雞絲涼面
凍食，幾香口。不過辣到跳舞。
元寶小雲吞
咪又係豬肉雲吞，不過細細隻好得意。
麻辣土豆
即係薯仔，成都周圍都有既小食，好味道。薯仔又係勁細粒，都唔知咩品種。
麻辣涼粉
一般四川菜館都有得食，又係辣到死。
驢打滾
明明係北京野，唔知點解成都都有。不過傳到黎味道唔同晒，酸酸粘粘的超難食。
麻辣免頭，五香免頭
成都流行食免仔，可能同山多免仔多有關。特別鐘意食免頭，而且仲好平。
係四川以經接近一個月，唔見銀包既後遺症仍然令我邊度都去唔到。今日終於將香港新領既信用咭羅番番黎。可以完成埋餘下既海螺溝，九寨溝行程。另一方面，西藏之行唔知等到何年何日，怕且都係要係四川留好長時間。
黎成都，點都要食下有名既川菜同麻棘火鍋。
成都既火鍋，當地一般叫火鍋或紅油火鍋。大陸仲有好多種其他鍋，常見既麻棘燙又同麻棘火鍋係兩回事。
同個當地人黎食，鍋底上桌，顏色的確係赫人。一般黎講，紅油鍋底係免費既，皆因大多係回收油。無錯，就係聞名天下，諗起都想嘔既循環再用鍋底，包括圖片呢一鍋。如個需要加一個清湯底，反而個清湯係要加錢既，真奇怪。
更令香港人覺得恐佈既，就係呢個叫做"油碟"既東西。"油碟"其實就係平時既醬料。不過成都人係用一整碗既菜油黎做醬料！將蒜粒，香菜，蠔油等等放人呢碗油裡面做成醬料。不過實話實說，只要忘記健康既問題，呢種火鍋搭配呢種"油碟"真係特別好味！
臨走前，當地人教授左分辨再用鍋底與非再用鍋底既大法。原來一d有規模既火鍋店以經採用非回收既鍋底，用完即棄。當火鍋食完之後，如果鍋底變成橙紅色，代表係曾經過無數次再用既回收油，如果鍋底係深紅色，就代表係新油。
好野，食完先知，真係唔知好過知…
